Ish-deputeti i Kuvendit të Kosovës, tani këshilltar për komunitete në Ministrinë e Jashtme, Qerim Bajrami, thotë se rezoluta për gjenocidin serb në Srebrenicë është mesazh për të pagjeturit.
“Është një porosi, një mesazh posaçërisht për këta që ende nuk janë të gjetur, eshtrat ekzistojnë atje afër varrezave në Srebrenicë, por janë shumë pak që tregojnë për një krim të tmerrshëm. Sepse, siç e dimë edhe për ata shumë që janë varrosur atje kanë vetëm një pjesë të trupit. Pse kanë vetëm një pjesë të trupit? Sepse, krimin e kanë bërë me makina, kamioneta, ku eshtrat i kanë shpërndarë dhe pjesët e trupave nëpër shumë gropa me arsyen që mos të gjejmë pastaj provat. Ende viktimat nuk janë varrosur, mbi 1 mijë. Rezoluta po na tregon që krimet nuk mund të kalojnë kurrë dhe bota demokratike është në anën e drejtësisë. Krimet nuk harrohen kurrë”, tha ai në emisionin “Info Nata” në Tëvë1.
I pyetur se kjo rezolutë a i hapë rrugë edhe Kosovës që të bëj padi për gjenocid ndaj shtetit të Serbisë, ai tha se vendi duhet të punojë shumë dhe duhet bërë përpjekje maksimale për gjetjen e provave.
Sot, Asambleja e Përgjithshme e Kombeve të Bashkuara miratoi rezolutën, sipas së cilës 11 Korriku shpallet Ditë Ndërkombëtare e Përkujtimit të Viktimave të Gjenocidit në Srebrenicë. Ndër tjerash kjo rezolutë dënon mohimin e gjenocidit dhe madhërimin e kriminelëve të luftës. Miratimi i kësaj rezolute u kundërshtua nga Serbia, derisa shtetet nismëtare, thanë se ajo nuk është kundër asnjë shteti, por shënjestron kryesit e gjenocidit./teve1.info/
