Mesfushori defensiv i Gjilanit, Blend Krasniqi e ka humbur pjesën e mbetur të këtij edicioni për shkak të lëndimit.
Klubi i Superligës së Kosovës ka njoftuar të mërkurën për lëndimin e rëndë të Krasniqit, i cili patjetër duhet t’i nënshtrohet operimit. Krasniqi gjatë ditëve në vijim do të operohet, përpara se t’i nënshtrohet fazës së rikuperimit.
“Periudha e kthimit në aktivitet do të vlerësohet pas operimit, teksa do të humbasë të gjitha ndeshjet e mbetura të këtij edicioni”, ka shkruar ndër të tjera Gjilani.
Krasniqi 19-vjeçar iu bashkua Gjilanit në fillim të këtij viti nga Dinamo City e Shqipërisë, ndërsa në Superligën e Kosovës ka regjistruar dy paraqitje.
Gjilani po lufton për mbijetesë këtë edicion, ndërsa aktualisht zë vendin e tetë në tabelë që siguron ndeshjen e barazhit.
Ka tubuar 27 pikë pas po aq ndeshjeve të luajtura në kampionat.