Treshja e realizuar nga Darnell Edge kur kishin mbetur edhe gjashtë sekonda deri në fund të ndeshjes, ia solli Trepçës trofeun e Ligës Unike duke e mposhtur Golden Eagle Yllin.
Edge realizoi për rezultatin 67:66, ndërsa në aksionin e fundit Jan Palokaj nuk ishte i saktë nga tentimi për tri pikë. Për Trepçën, ky është trofeu i parë i Ligës Unike, ndërsa i treti këtë edicion pas Superkupës dhe Kupës së Kosovës.
Në fakt, Trepça bëri rikthim fantastik pasi e shkriu epërsinë e Yllit prej 13 pikëve në çerekun e katërt për ta fituar ndeshjen.
Edge ndeshjen e mbylli 25 pikë të shënuara dhe ishte më efikasi te Trepça, ndërsa tek Ylli u veçua Alonso Verge me 28 pikë, 7 kërcime e 4 asistime.
