Vendet perëndimore janë të shqetësuara se ngritja ushtarake nga shteti ballkanik vjen në një kohë të brishtë për paqen në Evropë, raporton Daily Mail.
Beogradi ka rritur armaturën e tij në vitet e fundit me ndihmën e Rusisë dhe Kinës.
Të tre vendet nuk e njohin shtetësinë e Kosovës, e cila shpalli pavarësinë nga Serbia në vitin 2008.
Mediat dhe ekspertët ushtarakë thanë të dielën se gjashtë aeroplanë transportues të Forcave Ajrore Kineze Y-20 u ulën në aeroportin civil të Beogradit, herët të shtunën, që thuhet se mbanin sisteme raketore tokë-ajër HQ-22 për ushtrinë serbe.
Avionët kinezë të mallrave me shenja ushtarake u fotografuan në aeroportin Nikola Tesla të Beogradit.
Dorëzimi i armëve mbi territorin e të paktën dy vendeve anëtare të NATO-s, Turqisë dhe Bullgarisë, u pa nga ekspertët si një demonstrim i shtrirjes globale në rritje të Kinës.
Presidenca e Kosovës ka reaguar pas raportimeve se Kina i ka dhuruar armë Serbisë, duke kërkuar që të ndalet anëtarësimi i Serbisë në Bashkimin Evropian.
Ndërsa eksperti i sigurisë ndërkombëtare, Ilir Kulla ka thënë se sistemet raketore që Serbia i pranoi nga Kina, janë të prodhimit kinez me teknologji ruse moderne.
Ai ka tërhequr vërejtjen se ushtria e Serbisë vazhdon të armatoset gjithnjë e më shumë në vitet e fundit.
“Serbia zyrtarisht është një fuqi e paangazhuar ushtarake, është në rrugën e anëtarësimit në BE dhe është pjesa më e rëndësishme e Nismës Ballkan i Hapur. Atëherë lind pyetja për çfarë i duhet ky proces armatimi nëse ka vetëm plane paqeje?!”, ka thënë ai në reagimin e tij./KP
