Të enjten përfaqësuesit e tri komunave në veri të vendit, Mitrovicë e Veriut, Zveçan e Leposviq kanë dorëzuar në KQZ nënshkrimet e mbledhura nga qytetarët për shkarkimin e kryetarëve.
Kryesuesi i Kuvendit Komunal, Nexhat Ugljanin, të enjten në këtë qese solli në Komisionin Qendror të Zgjedhjeve, 4148 nënshkrimet e mbledhura nga grupi nismëtar serb, për largimin e kryetarit të Mitrovicës së Veriut, Erden Atiq.
Sipas Udhëzimit Administrativ të përpiluar nga ministria e Administrimit të Pushtetit Lokal, tashmë KQZ do të bëj verifikimin e nënshkrimeve.
“ Ne e kemi krye obligimin sipas Udhëzimit Administrativ dhe krejt në rregull ka shkuar dorëzimi në KQZ, peticioni nga grupi iniciues edhe e kam dorëzuar sa faqe janë nënshkruajtur, janë 423 faqe nënshkrimet janë 4148, edhe procedura nga KQZ u kon e rregullt tash është në duar të ministrisë përkatëse dhe KQZ-së”
Ngjashëm me Ugljanin, veproi edhe kryesuesja e kuvendit komunal të Zveçanit, Selvete Kelmendi.
“ Me datën 23 kam pranuar peticionin nga grupi iniciues, sot e dorëzova këtu në KQZ, gjithçka ka shkuar mirë, tani është në KQZ për ta bërë verifikimin dhe shkojmë tutje me këtë proces”
Kurse zëdhënësja e Komunës së Leposaviq, Agnesa Jashari para dorëzimit të peticionit tha se ka ankesa nga qytetarët për parregullsi në këtë proces.
“ Po ne e kemi sjellë peticionin në KQZ, gjitha nënshkrimet janë mbledhë procesi ka shkuar shumë mirë deri tash. I kemi disa ankesa nga qytetarët kryesisht, nga kryesuesi jo”
Pranimin e peticionit e ka konfirmuar edhe kryetari i Komisionit Qendror të Zgjedhjeve, Kreshnik Radoniqi.
Ndryshe nga këto tri komuna, ajo e Zubin Potokut peticionin për shkarkimin e kryetarit, Izmir Zeqiri e ka bërë ditë më parë.
Për shkarkimin e kryetarëve sipas Udhëzimit Administrativ të përpiluar nga Ministria e Administrimit dhe Pushtetit Lokal, në Mitrovicë e Veriut duhen 3 mijë e 640 nënshkrime, në Leposaviq 2 mijë e 689, në Zubin Potok 1 mijë e 347 dhe në Zveçan duhen 1 mijë e 411 nënshkrime.
Këto shifra përbëjnë 20-përqindëshin e votuesve të këtyre komunave.
Kronika e realizuar nga gazetari Venhar Isufi.