Basketbollistet e Bashkimit kanë shënuar fitore të thellë ndaj Prishtinës në derbin e xhiros së nëntë të Superligës së Kosovës.
Të premten, në palestrën “1 Tetori” në Prishtinë, Bashkimi triumfoi me shifrat 92:70 për t’iu hakmarrë Prishtinës për humbjen që ia shkaktoi në fund të muajit tetor.
Me këtë fitore, Bashkimi ndali hovin e Prishtinës, që ishte ekipi i vetëm pa humbje në tetë xhirot e para të Superligës së femrave.
Me këtë triumf, Bashkimi ka dalë në pozitën e parë në tabelë me 17 pikë, sa i ka edhe Prishtina por me koshdallim më të dobët.
Në derbin e së premtes, Bashkimi tregoi paraqitje të mirë, duke i fituar tre prej katër çerekëve. Çerekun e parë, Bashkimi e fitoi me shifrat 18:15, ndërsa periudha e dytë përfundoi 22:22 dhe skuadrat shkuan në pushim me epërsinë e kampionit të fuqi prej tri pikëve. Shkëputjen e madhe, Bashkimi e bëri në çerekun e tretë, të cilin e fitoi 33:17 për t’i dhënë fund dilemës së fituesit në këtë derbi. Skuadra nga Prizreni e fitoi edhe çerekun e katërt për ta mbyllur ndeshjen me 22 pikë dallim.
Pesë basketbolliste të Bashkimit, e mbyllën ndeshjen me pikë dyshifrore. Kapitenia Aulona Muhadri ishte më efikasja me 11 pikë e 18 kërcime, ndërsa Arbnore Përquku pati 17 pikë e 12 asistime. Në këtë triumf, kontribuan edhe Jeta Zeka (17 pikë), Sarah Mgbeike (19 pikë) e Jasime Carson (22 pikë).
Në anën tjetër, te Prishtina më e dalluar ishte Jade Williams me 24 pikë e 11 kërcime. Asianae Johnson pati 16 pikë, ndërsa 11 sosh shtoi edhe Malvina Haziri por që nuk mjaftuan për ta evituar humbjen nga Bashkimi.
