Maqedonia e Veriut do të jetë nikoqire e takimit të 30-të të Këshillit Ministror të OSBE-së. Kjo ngjarje politike që fillon nga data 29 nëntor do të zgjasë deri më 1 dhjetor dhe siç është raportuar në mesin e temave të diskutimit do të jenë: situata e konflikti Rusi-Ukrainë, dialogu Kosovë-Serbi, paqja në rajon, ndryshimet klimatike etj.
76 delegacione nga 57 vende anëtare të OSBE-së dhe partnerë të organizatës do të jenë pjesëmarrës në takimin e këtij vit. E veçantë e kësaj ngjarje u cilësua fakti se që nga fillimi i luftës në Ukrainë, si rrallëherë Sekretari amerikan i Shtetit Anthony Blinken dhe Ministri i jashtëm i Rusisë Sergej Lavrov, marrin pjesë në të njëjtin takim.
Profesori Universitar nga Maqedonia e Veriut, Mersel Bilalli, thotë se nuk pret ndonjë rezultat të madh nga ky takim, pasi sipas tij, vetë OSBE-ja ka probleme të mëdha në aspektin e brendshëm që nga fillimi i luftës në Ukrainë.
Njohësi i çështjeve politike Arben Fetoshi, thotë se Blinken në këtë takim do të rikonfirmoj qëndrimet amerikane për sigurinë e rajonit dhe rrugën tutje të dialogut Kosovë – Serbi.
OSBE vendimet i merr bazuar në parimin e unitetit të 57 vendeve anëtare, por që aktualisht organizata po përballet me probleme në funksionim për shkak të vetos ruse.
