Nata e së mërkurës nuk ishte e qetë për banorët e lagjes “Kodra e Trimave” në Prishtinë.
Në rrugën “Fahri Fejza”, në këtë lagje, persona të panjohur kanë hedhur një granatë dore në orën 23:45.
E për pasojë muri i shtëpisë së familjes Uka është shkatërruar.
Madje nga shpërthimi janë shkaktuar edhe dëme tjera.
Muharrem Uka, i cili është vëlla i pronarit të shtëpisë , thotë se familja e tij nuk kishte asnjë probleme dhe se nuk e di arsyet e këtij shpërthimi.
E Faik Ymeri i cili banon në këtë rrugë, tregon se si u dëgjua zhurma.
Të shqetësuar për këtë ngjarje janë edhe banorët e tjerë të lagjes Kodra e Trimave.
Për këtë rast, Policia ende nuk i ka të njohura rrethanat se çka dërgoi deri tek ky shpërthim.
“Njësitet policore pas pranimit të informatës për një shpërthim, kanë dalë në vendin e ngjarjes, dhe kanë takuar dy ankuese kosovare, të cilat kanë deklaruar se si pasojë e shpërthimit në afërsi të shtëpive të tyre u janë shkaktuar dëme materiale në pronat e tyre dhe në një veturë. Në vendin e ngjarjes kanë dalë edhe njësitet e PK-së për deminim, ku dyshohet se mjeti shpërthyes ka qenë garantë dore, i cili ka shpërthyer në rrethana (ende) të panjohura”, thuhet nga Policia.
Ndërsa nga prokuroria thonë se janë duke hetuar rastin.
“Pas pranimit te informatës nga policia, prokurori kujdestar ka urdhëruar te njëjtit t’i ndërmarrin te gjitha veprimet e nevojshme hetimore, me qellim te ndriçimit te gjitha rrethanave të këtij rasti”, ka njoftuar Prokuroria.
Shpërthim me granate dore të mërkurën pati edhe në Prizren, ku mbeten të lënduar 10 persona.
