Kryetari i Lidhjes Demokratike të Kosovës, Lumir Abdixhiku, ka kërkuar nga Qeveria Kurti që t’i heqin disa mëditje nga shëtitjet e tyre, për ta zgjidhur problemin me pagat e policëve.
Përmes një postimi në Facebook, Abdixhiku ka thënë se pas sulmit terrorist në Banjskë, një qeveri normale nuk do t’i lejonte djemtë elitarë në protestë.
“Për t’i marrë 2,200 euro u duhet të luftojnë me kriminelë e terroristë, me nga 20 orë punë e 4 orë gjumë – dhe atë çfarë pune e çfarë gjumi se! I thonë punë jashtë orarit; punë shtesë. Për punë të tillë mos paçin nevojë asnjëherë; por janë aty sa herë që kemi nevojë; si vend, si shtet si shoqëri. I thonë angazhim patriotik për atdheun. Paga e tyre është 630 euro BRUTO! Kaq paguhen. 550 euro NETO! Po kërkojnë dinjitet. Dhe dinjitet meritojnë këta dhjetra djem. Hiqni ca meditje nga shëtitjet e thata dhe zgjidhjen e keni krejt të lehtë. Një Qeveri normale nuk do të lejonte – aq më pak pas sulmit terrorist – t’i kishte djemtë elitarë në protestë. Një Qeveri normale nuk do t’i trajtonte këta djem me propagandë!”, ka shkruar Abdixhiku.
Sipas Abdixhikut, Qeveria po bën propagandë me të gjitha shtresat në vend.
“Por Qeveri normale nuk ka ky shtet. Ka mashtrues që nxisin turma edhe në këtë temë. Edhe një përplasje e re. Edhe një propagandë. Sikurse me minatorë, mësues, polic e me secilën shtresë në këtë vend”, thuhet tutje në postim./teve1.info/.