Kryeministri i Kosovës, Albin Kurti, ka shprehur ngushëllime për skulptorin Luan Mulliqi, i cili sot ka ndërruar jetë.
Kurti ka thënë se si veprat, edhe emri i Mulliqit jehon gjithandej.
“Shkrimtarit më të madh shqiptar, Ismail Kadaresë, iu kishte ngulitur aq thellë në mendje një skulpturë e Nënës Terezë sa edhe pati shkruar: ‘Nënë Tereza e Mulliqit ka një metaforë të rrallë që duke shpërthyer nga toka dëshmon për vërtetësinë e shenjtores sonë’”, ka shkruar Kurti në Facebook.
Kryeministri, Mulliqin e quajti artist me shije të hollë e me dije të gjerë.
“Pafund janë vendet në të cilat ka ekspozuar e ku veprat e tij janë të koleksionuara, njësoj sikur pafund janë punët që la pas. Një artist me shije të hollë e me dije të gjerë nga sot nuk është më në mesin tonë. Mungesën do t’ia ndjejmë përherë më shumë, por, Luanin do ta shohim në qytet nëpërmjet punës së tij. Artisti nuk shuhet, sepse vepra e tij jeton”.
Kurti i ka shprehur ngushëllime familjes, miqve, kolegëve e studentëve të tij.
“Ngushëllime familjes, miqve, kolegëve e studentëve të tij! Ngushëllime të gjithë neve!”, është shprehur Kurti.
Mulliqi, ishte anëtarë korrespodent dhe sekretar shkencor i Akademisë së Shkencave dhe Arteve të Kosovës. Ai po ashtu ishte edhe drejtor i Galerisë së Arteve.
ASHAK, njofton se për nder të tij nesër (e hënë) do të mbahet mbledhja komemorative e cila fillon nga ora 11:00.
Ndërkaq, nga ora 11:30 fillojnë homazhet për të ndjerin. Funerali niset nga Akademia e Shkencave në ora 13:00, ndërsa varrimi do të bëhet në varrezat e qytetit të Gjakovës në orën 16:00./teve1.info/
