Largimi i Karim Benzemasë nga Reali i Madrid drejt Arabisë Saudite ishte një nga më befasuesit në treg, veçanërisht për shkak se francezi kishte edhe një vit të mbetur në kontratë, por sipas deklaratave të tij më të fundit, kalimi në Al-Ittihad, me bazë në qytetin Jeddah, nuk është aq befasues dhe justifikohet plotësisht nga lojtari.
“Gjithmonë kam dashur të vij në Arabinë Saudite edhe para futbollit. Si mysliman, kur je afër Mekës, ndihesh i qetë, i pastër. Është një vend i jashtëzakonshëm, uroj që të gjithë myslimanët të mund të shkojnë atje një ditë. Këtu jam në paqe”, deklaron francezi në një intervistë për Ligën Saudite. Meka ndodhet vetëm një orë larg qytetit ku jeton Benzema.
35-vjeçari thotë se e ndjeu gjithashtu sfidën e ndryshimit të peizazhit dhe hyrjes në një Ligë në zhvillim, pas kaq shumë vitesh në Spanjë.
“Kur filloi projekti i futbollit, dukej i madh në çdo aspekt. Doja të isha pjesë e kësaj historie, të merrja pjesë dhe të ndihmoja futbollin të avanconte në vend”, vijon ai.
Me gjithçka që kishte bërë dhe arritur te Reali, ishte momenti ideal për të lëvizur.
“Jam shumë krenar për gjithçka arrita dhe fitova me Realin, por mendoj se ishte një kohë e mirë për të ndryshuar dhe për të provuar sfida të reja. Këtu ka shumë pasion dhe jam i kënaqur me nivelin e lojës. Në fakt, jam i befasuar nga niveli këtu, sepse në Evropë nuk kemi parë ndeshje nga kjo Ligë. Tani, ka më shumë njerëz që shikojnë sepse ka kaq shumë lojtarë të mirë.”
Sulmuesi francez thotë se është përshtatur lehtësisht me kulturën vendase: “Më pritën krahëhapur, u ndjeva i mirëpritur menjëherë, jam shumë i lumtur dhe mundohem të jap më të mirën në fushë.”
Tek Al-Ittihad Benzema ka shënuar deri tani gjashtë gola dhe ka dhënë tri asistime në 11 ndeshje. Skuadra, kampione në fuqi, aktualisht është e 4-ta, me 19 pikë, 4 pas Al Hilalit.