Ka filluar mbledhja e 165-të e Qeverisë së Kosovës.
Me ç’rast, Ministri i Financave, Hekuran Murati, vlerësoi që me “Forcimin e Qeverisjes Digjitale”, do të përmirësohet cilësia e shërbimeve publike, njëherit qasja e përdoruesve në to.
“Në kuadër të bashkëpunimit me donatorët bilateral dhe institucionet ndërkombëtare financiare, Qeveria e Kosovës e financuar nga Ministria e Financave, Punës dhe Transfereve, ka nënshkruar projektin “Forcimi i Qeverisjes Dixhitale për ofrimin e shërbimeve me Asociacionin ndërkombëtar për zhvillim që është pjesë e Bankës Botërore”. Kjo marrëveshje me Bankën Botërore, e kap vlerën totale prej 18.5 milionë eurosh. Ky projekt do t’i mundësojë Qeverisë ta përmirësojë cilësinë e shërbimeve publike si dhe qasjen e përdoruesve në to, përmes digjitalizimit dhe avancimeve publike, gjithashtu synohet edhe zvogëlimi i barrës administrative dhe kostos financiare si për qytetarët, ashtu edhe për administratën”, deklaroi Murati.
Po ashtu, ministri i financave tregoi më shumë për qëllimin e këtij projekti si dhe për mënyrën e zbatimit, shkruan teve1.info.
“Projekti do të zbatohet bashkërisht përmes njësisë për transformimin digjital nga Zyra e Kryeministrit. Për më tepër, qëllimi I projektit është përforcimi i kornizës institucionale dhe ligjore të qeverisjes së të dhënave si dhe forcimi i strukturës institucionale në bashkërendim me strategjinë e qeverisjes elektronike 2022-2027”, potencoi tutje Murati./teve1.info/.