Deputeti i Partisë Demokratike të Kosovës, Përparim Gruda ka deklaruar se miratimi i Ligjit për Dhomat e Specializuara, është triumf i një përpjekjeje për drejtësi nga institucionet dhe rezistenca qytetare.
Gruda, në konferencë për media, ka falënderuar të gjithë deputetët që votuan ligjin dhe qytetarët që protestuan për gati tri javë me kërkesën për miratimin e tij.
“Jam sot në këtë konferencë për media, në emër të Partisë Demokratike të Kosovës, për të shprehur mirënjohjen më të thellë për qytetarët e Kosovës, për t’i falënderuar që me ditë të tëra kanë protestuar dhe kanë kërkuar miratimin e ligjit që mbron luftën e drejtë të UÇK-së. Dhe për të falënderuar kolegët deputetë për votimin e ligjit të sponsorizuar nga Partia Demokratike e Kosovës. Tani detyra jonë është që, si qytetarë, si institucione, të qëndrojmë prapa çdo rreshti, çdo shkronje të këtij ligji, për ta jetësuar dhe, me këtë, për ta mbrojtur luftën e drejtë të UÇK-së”, theksoi ai.
Gruda tha se ky ligj synon të garantojë gjykim të drejtë, të pavarur, sipas standardeve të Konventës Evropiane për të Drejtat dhe Liritë e Njeriut dhe nuk ndërhyn në pavarësinë e gjyqësorit dhe nuk shkel asnjë detyrim ndërkombëtar që ka marr Kosova. “Gjykata Speciale nuk po mbyllet por po i sqarohet juridiksioni dhe po garantohet procesi i drejtë gjyqësor”, tha ai.
Tutje, Gruda në emër të PDK-së ka uruar për detyrën e marrë, presidenten e re të Republikës së Kosovës, Justina Shiroka – Pula.
“Jemi të bindur që profesoresha e nderuar do ta kryejë këtë detyrë me nder, me përgjegjësi, duke respektuar Kushtetutën e Kosovës dhe ligjet e saj. Jam i bindur që institucioni i Presidencës është i nderuar ta ketë për Presidente zonjën Shiroka-Pula. I urojmë punë të mbarë dhe suksese në detyrën e saj, në mbrojtje të Kushtetutës së Kosovës, të drejtave dhe lirive të njeriut, respektimit të ligjeve dhe promovimit të Kosovës në arenën ndërkombëtare, veçanërisht në garantimin e unitetit juridiko-kushtetues, siç është definuar qartësisht në Kushtetutën tonë”, ka përfunduar Gruda.
