Kombëtarja e Shqipërisë në futboll i ka vazhduar të martën përgatitjet për ndeshjen vendimtare ndaj Çekisë. Ndeshja Shqipëri – Çeki zhvillohet të enjten prej orës 20:45 në “Air Albania” në Tiranë. Është ndeshje që mund të përcaktojë fatin e Shqipërisë për kualifikim në “Euro 2024”.
Lojtarët e Shqipërisë kanë zhvilluar një lojë kontrolluese mes vete gjatë stërvitjes së zhvilluar të martën.
Nën urdhrat e selektorit Sylvinho ishin 21 futbollistë. Për të plotësuar grupin e lojtarëve, shtabi teknik angazhoi edhe disa lojtarë të Kombëtares U19.
Ka pasur edhe shqetësim në kampin kuqezi. Sulmuesi Armando Broja ka pasur një shqetësim fizik dhe ka stërvitur i diferencuar, ka njoftuar Federata Shqiptare e Futbollit.
“Departamenti i Komunikimit në FSHF bën me dije se grupit i është bashkuar dje në darkë edhe sulmuesi Myrto Uzuni. Sakaq mesfushori Keidi Bare ka zhvilluar edhe sot stërvitje të diferencuar nga grupi. Sulmuesi Armando Broja pas një shqetësimi fizik dhe pas kontrolleve mjekësore ka kryer gjithashtu stërvitje veçmas nga grupi dhe pritet t’i bashkohet nesër ekipit. Edhe mesfushori Klaus Gjasula ka mbërritur tashmë në Shqipëri dhe pritet të nisë përgatitjet me skuadrën ditën e nesërme”, ka njoftuar FSHF-ja të martën mbrëma.
Broja llogaritet sulmuesi më i mirë i Shqipërisë. Ai është kthyer javë më parë te Chelsea, ku po vlerësohet lart. Edhe te Shqipëria është kthyer pas një kohe të gjatë dhe pritet të jetë armë e rëndësishme e selektorit Sylvinho. Mungesa eventuale e tij do të ishte goditje e madhe për ndeshjen me Çekinë.
Sylvinho tashmë nuk mund të llogaritë në mbrojtësin e qendrës Ardian Ismajli, që është kthyer në Itali. Ismajli ka një lëndim dhe nuk mund të rikuperohet në kohë për ndeshjen me Çekinë.
Të dielën Shqipëria luan ndeshje miqësore me Bullgarinë.