Një hulumtim për ndotjen e ajrit nga Dioksidi i Azotit zbërtheu rezultate që tregojnë shqetësimin që paraqet NO2 për shëndetin e njeriut.
Cilësia e ajrit mblodhi në një tryezë përfaqësues të organizatave jo qeveritare, zyrtarë qeveritar, komunal dhe aktivistë të ambientit.
Në këtë organizim u theksua që ndotja e ajrit është rreziku më i madh mjedisor për shëndetin dhe shkaktari kryesor i efekteve të dëmshme shëndetësore që përkeqëson sëmundjet e frymëmarrjes dhe ato kardiovaskulare.
Këtu u shpalos hulumtimi i ndotjes së ajrit me Dioksid të Azotit nga trafiku rrugor në Komunë e Prishtinës.
Kjo ndotje u tha se vjen kryesisht nga makinat.
“Matja është bërë në dy faza në të parën janë vendosë në 15 lokacione ku ndotja është më e madhe në lagjet e Prishtinës i kemi dërgu në një laborator në Zvicër dhe më pas kemi vazhdu prapë në shkurt dhe i kemi përzgjedhë këto 15 sepse është e panevojshme të bëhet matje ku ka ndotje të ulët sepse është e kushtueshme , ku ndotja ka qenë mbi vlerat e lejuara të OBSH-së”, ka deklaruar Arben Lila nga Qendra Kosovare për Zhvillim dhe Avokim-KADC.
Nga Komuna e Prishtinës deklaruan se kanë hartuar një plan veprimi për cilësinë e ajrit.
Kurse profesoresha e mjedisit, Antigona Ukëhaxhaj tha se të gjithë janë dëshmitarë për kërcënimin serioz që paraqet ndotja e ajrit.
Ajo ka treguar edhe cilat qytete janë më të ndotura.
“Tejkalime ka pasur edhe në Republikën e Kosovës, qytetet më të ndotura janë Prishtina, Fushë-Kosova , Obiliqi, Ferizaj, Gjilani dhe Prizreni”, ka thënë Ukëhaxhaj.
Më tej të pranishmit theksuan rëndësinë e ndërgjegjësimit të publikut dhe ngritjen e nevojës për institucionet kompetente për mbrojtjen e cilësisë së ajrit dhe ruajtjen e shëndetit publik në Kosovë.
Ndërkohë në këtë tryezë morën pjesë Komuna e Prishtinës, Ministria e Mjedisit, Planifikimit Hapësinor dhe Infrastrukturë, Agjencioni për Mbrojtjen e Mjedisit të Kosovës, Instituti Hidrometeorologjik dhe Instituti Kombëtar i Shëndetësisë Publike.
Autore: Riga Gjata