Jetën e zhvillojnë në mbi 1600 metra lartësi mbidetare.
Por banorët e fshatit Stankaj të cilët jetojnë në Bjeshkët e Nemuna, tash e disa vite po ballafaqohen me problemin e ujit të pijshëm.
Më shumë se gjysma e tyre duhet të gjejnë alternative për sigurimin e ujit, kjo pasi burimi i vetëm i fshatit nuk po i plotëson të gjitha nevojat e tyre.
Por, së fundmi iu është shtuar edhe një hall tjetër.
Banorët po kundërshtojnë projektin e nisur nga Komuna e Pejës, pasi sipas tyre dërgimi i ujit edhe në dy fshatrat e tjera, po bëhet për interesa të disa personave.
Por, nga Komuna e Pejës i mohojnë pretendimet e banorëve. Ndërsa thonë, se qëllimi i vetëm i projektit në fjalë, është furnizimi me ujë të pijshëm për banorët e fshatit Stankaj, Bogë e Shkrel.
Megjithatë, për këtë çështje banorët kanë edhe një lëndë në gjyq, ku kërkohet anulimi i vendimit të Ministrisë së Mjedisit, i cili lejon shpërndarjen e ujit nga burimi në Stankaj, në dy fshatrat e tjera.
Lënda e cila është dorëzuar në muajin shator të vitit të kaluar aktualisht është në Gjykatën e Apelit në Prishtinë.