Pasditën e së hënës Gjilani dhe Prishtina u ndanë baraz pa gola në stadiumin e qytetit në Gjilan, në kuadër të xhiros së dytë të Superligës së Kosovës.
Skuadra vendëse u paraqit me futbollist kryesisht të rinj, madje disa prej tyre debutues në elitën e futbollit.
Mbrojtësi i krahut, Qëndrim Ismajli tha se nuk ishte aspak e lehtë për këtë grup të përballej me Prishtinën duke e ditur forcën e tyre dhe se nuk kanë patur shumë kohë për t’u përgatitur.
“Bëm një ndeshje shumë të mirë. Sigurisht se ishte e vështirë, pasi përballë kishim një super skuadër si Prishtina dhe kemi vetëm një javë që këmi filluar stërvitjet. Disa nga lojtarët shijuan për herë të parë Superligën.
Ismajli luan si mbrojtës i majtë, mirëpo në këtë ndeshje u paraqit si qendër mbrojtës, teksa pohon se nuk e pati problem. Ai përmend edhe përgatitjet me skuadrën dhe rikthimin me trajnerin Mezani.
“Ishte hera e parë që luaj në qendër, por është afër pozitës time dhe nuk e pata problem. Jemi pak vonë me përgatitjet, por dita ditës po e marrim veten pasi po punojmë mjaft shumë. Kjo është hera e dytë që punoj me trajnerin Mezani, ishte ai që më dha minutat e parë pikërisht kundër Prishtinës. Është trajner punëtor dhe shumë motivues.
Ishmbrojtësi i Flamurtarit paralajmëron kundërshtarët duke thënë se Gjilani do të jetë skuadër konkurrense këtë edicion, duke lënë prapa problemet që ka patur deri më tani.
“Gjilani ju premtoj se do të jemi arrë e fortë përballë çdo kundërshtari, së bashku me grupin që kemi dhe lojtarët që do të na bashkëngjiten në fillim”.
Gjilani sezonin e kaluar e përfundoi në pozitën e tretë, ndërsa u mposht në finale të Kupës nga Prishtina, megjithatë pati paraqitje në garat evropiane.