Federata e Basketbollit të Kosovës ka reaguar dhe dënuar fuqishëm incidentin e raportuar pas ndeshjes Sigal Prishtina – Golden Eagle Ylli, e luajtur të dielën në kryeqytet.
Pas ndeshjes, të cilën e fitoi Ylli, është raportuar se gjyqtarët janë përballur me ofendime, kërcënime dhe sulm fizik gjatë largimit nga palestra.
“FBK dënon fuqishëm çdo formë të dhunës, kërcënimit, frikësimit apo presionit ndaj gjyqtarëve, zyrtarëve të ndeshjeve dhe të gjithë pjesëmarrësve në basketboll.Siguria, integriteti fizik dhe dinjiteti i gjyqtarëve dhe zyrtarëve të ndeshjeve janë të panegociueshme. Dhuna nuk ka dhe nuk do të ketë vend në basketbollin e Kosovës”, ka shkruar FBK.
FBK ka adresuar rastin edhe në Këshillin për Sport, duke kërkuar ndërmarrjen e masave për identifikimin dhe trajtimin ligjor të personave të përfshirë në incident.
Krahas veprimeve të institucioneve të rendit dhe drejtësisë, FBK do ta trajtojë rastin në përputhje me rregulloren disiplinore dhe akteve tjera normative në fuqi.
“Dhuna nuk ka vend në basketboll, kërcënimi nuk është pjesë e sportit, siguria dhe integriteti i pjesëmarrësve në basketboll janë të panegociueshme”, ka mbyllur FBK reagimin.
