Në mbledhjen e sotme të Qeverisë është miratuar projektligji për ndryshim/plotësimin e ligjit për skemat pensionale, i cili mundëson njohjen e kontributit të punëtorëve të larguar nga puna në vitet 1990.
Bashkimi i Sindikatave te Pavarura te Kosovës, derisa e ka mirëpritur këtë vendim, u ka bërë thirrje deputetëve të Kuvendit të Kosovës që sa më parë ta miratojnë këtë projektligj.
“BSKP pret rritjen e mirëqenies sociale e ekonomike. Lajmi i sotëm përkitazi me miratimin e projektligjit për plotësim ndryshimin e Ligjit për Skemat Pensionale të Financuara nga Shteti, nr. 04/L-131, obligon Partnerin tonë social edhe për punë më intensive drejt plotësimin e kërkesave. Bashkimi i Sindikatave të Pavarura të Kosovës thërret deputetët e Kuvendit të Kosovës që sa më parë ta miratojnë këtë projektligj për t’i hapur rrugë shpalljes së shumëpritur të tij që të mund të fillojë e të zbatohet për të rritur sado pak mirëqenien sociale e ekonomike të qytetarëve që derdhën djersën gjithë andej vendit tonë për të mirën e përbashkët. Kërkesat e Bashkimit të Sindikatave të Pavarura të Kosovës ishin kërkesa të arsyeshme dhe do të jenë edhe në vazhdim të arsyeshme e të pandalshme”, thuhet në njoftimin e tyre në Facebook.
Njëherit, BSPK pret që të caktohet dhe miratohet vlera e duhur financiare e pagës minimale për vitin 2024.
“Bashkimi i Sindikatave të Pavarura të Kosovës pret që sa më parë të caktohet e të miratohet edhe vlera e duhur financiare e pagës minimale e të negociohet vlera e re për vitin 2024, po edhe të bëhet nënshkrimi i Kontratës së Përgjithshme Kolektive e që së bashku me plotësim ndryshimin e Ligjit për Skemat Pensionale të Financuara nga Shteti, po edhe me miratimin e Ligjit për Sigurimin Shëndetësor të nisë ndërtimi i mirëqenies së duhur sociale e ekonomike për të punësuarit po edhe për familjet e tyre e njëkohësisht edhe për të gjithë qytetarët”, thuhet tutje në njoftimin e tyre.
Me këtë rast, kryeministri Albin Kurti tha se po ndërtojnë një sistem pensional të barabartë që garanton pensione stabile për pensionistët, përcjell teve1.info.
Miratohet vendimi për ndryshimin e ligjit për skemat pensionale
