Shkolla Teknike në Mitrovicën e Veriut, që zakonisht mbushet me nxënës për mësim, të mërkurën pati një tjetër funksion.
Këtu u mblodhën qytetarë serbë, veçse jo për mësim, por për të zhvilluar fushatë per zgjedhjet ne Serbi.
Por, ky aktivitet nuk shkoi deri në fund, pasi ndërhyri Policia e Kosovës, e cila nuk lejoi zhvillimin e tij.
Veton Elshani, zëvendëskomandant i Policisë në Mitrovicën e Veriut bëri të ditur se në këtë fushatë morën pjesë edhe deputetë serbë.
Për ekspertin e sigurisë, Arben Dashevci, tubime të tilla mund të kenë pasoja për sigurinë në vend.
Ai vlerëson se aktivitete të tilla janë ilegale dhe nuk duhet të lejohen.
Aktivitete të ngjashme ishin paralajmëruar edhe në lokacione të tjera të Kosovës, por ato janë anuluar.
Më 5 tetor, Komisioni Republikan i Zgjedhjeve në Serbi, mori vendim që votuesit nga Kosova të mund ta ushtrojnë të drejtën e votës në këto zgjedhje, në Vranjë, Rashkkë, Kurshumli dhe Tutin.
Këtë formë të votimit, serbët e Kosovës e përdorën edhe në zgjedhjet për Kuvendin e Serbisë në vitin 2023, pasi Qeveria e Kosovës nuk lejoi hapjen e vendvotimeve brenda territorit të Kosovës.
