Veturat u pozicionuan afër kufirit me Serbinë.
Në pikëkalimin në Merdarë u shtua edhe numri i zyrtarëve policorë të Kosovës.
Kjo për të pritur kolegët e tyre të liruar nga Gjykata e Kralevës në Serbi.
Rifat Zeka, Beqir Sefa e Mustafë Shemi u liruan në procedurë të rregullt për mbrojtje në liri nga kjo gjykatë.
E me të arritur në Merdarë, nuk munguan lotët e gëzimit.
Të tre zyrtarët policorë u nisën menjëherë drejt Prishtinës për t’u takuar me ministrin e Punëve të Brendshme, Xhelal Sveçla. Ndërkohë, gëzim e festë pati në shtëpinë e Rifat Zekës.
“Fort jam gëzuar që erdhën…”, tha Shefkie Zeka, nëna e Rifat Zekës.
Për t’iu bashkuar në gëzim, tek familja e policit të liruar erdhën edhe shokë e bashkëfshatarë.
“Është ditë gëzimi, është emocion i veçantë…’’, tha Fitim Kastrati, shok i klasës së Rifat Zekës.
“Nuk kemi besuar që kaq shpejt e lirojnë…”, tha bashkëvendësi i tij, Besim Kabashi,
Tre policët, Rifat Zeka, Beqir Sefa e Mustafë Shemi ishin arrestuar me 14 qershor, me pretendimin se kanë hyrë në territorin e Serbisë, gjë që është demantuar në vazhdimësi nga Policia dhe Ministria e Punëve të Brendshme e Kosovës.
