Kampioni i Kosovës në futboll, Ballkani, ka barazuar në ndeshjen e parë miqësore të zhvilluar në Ohër, ku edhe po e kryen fazën përgatitore para dueleve në rundin e parë kualifikues të Ligës së Kampionëve.
Në duelin e luajtur të premten në stadiumin “Biljanini Izvori” në Ohër, Ballkani ka luajtur 2:2 me kampionin e Maqedonisë së Veriut, Strugën.
Veton Tusha dhe Nazmi Gripshi, kanë shënuar për ekipin nga Suhareka.
Në fakt, Ballkani pas vetëm gjashtë minutave, krijoi epërsi prej dy golave ndaj Strugës. Fillimisht, rezultatin e zhbllokoi Tusha në minutën e tretë, ndërsa Gripshi e dyfishoi epërsinë tri minuta më vonë.
Pas dy golave të pranuar, Struga reagoi duke realizuar dy herë brenda pjesës së parë, për t’i dhënë fund epilogut të këtij dueli përgatitor.
