Është ngritur aktakuzë ndaj serbit M.GJ.i dyshuar për krime lufte në Ozdrim të Pejës kishin vrarë 19 qytetarë civil shqiptarë, raporton teve1.info
Prokuroria Speciale e Republikës së Kosovës, ka njoftuar përmes komunikatës se i pandehuri ngarkohet me veprën penale “Krim i luftës kundër popullsisë civile”, e sanksionuar me nenin 142 lidhur me nenin 22 të Ligjit Penal të Republikës Socialiste Federative të Jugosllavisë ( tutje “LP-RSFJ”) si ligj në fuqi në kohën e kryerjes së veprës penale.
Sipas komunikatës së Prokurorisë Speciale të Kosovës, ka dyshime të bazuara se i pandehuri e ka kryer veprën penale gjatë periudhës janar-qershor të vitit 1999 në Ozdrim të Pejës.
“I pandehuri akuzohet se gjatë kohës së luftës në Kosovë, prej muajit Janar 1998 deri me 21 qershor 1999, në fshatin Ozdrim të Komunës së Pejës, si pjesëtar i forcave policore dhe ushtarake serbe me datë 07.05.1999 fillimisht e rrethuan fshatin Ozdrim, e pastaj filluan një ofensive ushtarako-policore duke shtënë me armë në drejtim të popullsisë civile me ç ‘rast u vranë (19) civilë të nacionalitetit shqiptarë”, thuhet në komunikatë.
Sipas njoftimit të Prokurorisë, hetimet kanë siguruar prova të mjaftueshme relevante juridike që dëshmojnë dyshimin e bazuar mirë se i pandehuri në bashkëkryerje me persona të tjerë të forcave policore dhe ushtarake serbe, ka marrë pjesë dhe ka kontribuar në kryerjen veprës penale për të cilën po akuzohet.
“Kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë për procedurë të mëtutjeshme. I pandehuri gjendet nën masën e sigurisë – paraburgim, sipas vendimit të Gjyqtarit të procedurës paraprake deri në një vendim të ri nga ana e gjykatës”, thuhet në komunikatën e Prokurorisë Speciale të Kosovës.
