Kryetari i PDK-së, Memli Krasniqi bëri të ditur se gjatë takimit të partive opozitare me emisarin e BE-së, Miroslav Lajçak dhe atë të SHBA-së për Ballkanin Perëndimor, Gabriel Escobar është diskutuar për zhvillimet e fundit në veri të Kosovës.
Krasniqi theksoi se shqetësimi për situatën aktuale është i madh, teksa potencoi se kanë shprehur gatishmëri për të ndihmuar në ruajtjen e lidhjeve të Kosovës me SHBA-në, përcjell teve1.info
“Vërtetë shqetësimi për situatën aktuale është i madh. Ne po shohim që nuk ka një lëvizje përpara. Ka një situatë e cila është duke dëmtuar Kosovën në kuptimin e raporteve të saj ndërkombëtare, në radhë të parë me partnerët strategjik. Andaj kërkuam dhe shprehëm gatishmërinë tonë që të luajmë rolin tonë shtetëror për të ruajtur relacionet e Kosovës me SHBA në radhë të parë dhe me shtetet e BE po ashtu”, deklaroi ai para mediave.
Kreu i PDK-së tha se kjo situatë ka ardhur pasi Qeveria ka ndërmarrë vendime pa konsultim, në mënyrë të fshehur e pa koordinim, teksa u shpreh se asnjëherë nuk ka parë një shqetësim më të madh te ndërkombëtarët.
“Asnjëherë nuk kam parë një shqetësim më të madh, nuk është ndjenjë e mirë të dëgjosh përfaqësuesit duke shprehur këtë zhgënjim me Qeverinë”, tha ai.
Ai po ashtu shtoi se gjatë këtij takimi nuk është diskutuar për mundësinë për zgjedhje të reja.
Siç tha Krasniqi, për momentin “ajo çfarë është shumë e rëndësishme është moskrijimi i mundësive për përshkallëzim të situatës së sigurisë, ruajtja e qetësisë dhe rruga para nesh”.
Krasniqi ka kritikuar edhe presidenten e vendit, Vjosa Osmani, duke thënë se nuk duhet të hesht karshi kësaj situate.
“Është e paarsyeshme që presidentja të hesht, është komandante e ushtrisë, e përjashtimi i ushtrisë nga ushtrimi ‘Defender’ është përgjegjësi edhe e saj. Nuk kam dëgju që ka folur, ndërsa 1 mijë ushtarë të Kosovës janë zhgënjyer nga përjashtimi”, deklaroi tutje ai. /Teve1.info/