Hulumtimi i Donjeta Murselajt, “Fati i zi i Drinit të Bardhë”, është shpërblyer me çmimin e dytë në garën për gazetari të gjelbër, raporton teve1.info
Hulumtimi i gazetares Donjeta Murselaj i realizuar së bashku me Eriona Hotin, ka shfaqur shkeljet ligjore që eksploatuesit ilegal i kanë bërë shtratit të lumit “Drini i Bardhë”, e të cilat nuk janë ndëshkuar ende nga askush.
Murselaj në emisionin “Herët” në Teve1, ka treguar se gjatë punës hulumtuese në terren, ka parë ekskavator duke eksploatuar rërë në shtrat të lumit, derisa sipas saj Ligji për Ujërat e kufizon eksploatimin në më së afërti 150 metra largësi nga shtrati i lumit.
“Titullin ‘Fati i zi i Drinit të Bardhë’ ia kemi lënë sepse mbiemri që e shoqëron ermin e këtij lumi nuk e përcolli fatin e tij për shkak se është shkatërruar nga eksploatuesit duke nxjerrë zhavorrin, duke e dëmtua rrjedhën e lumit dhe shkaktuar dëme banorëve dhe pronarëve të tokave përreth lumit”, tha ajo.
Murselaj tha se Kosova aktualisht i ka 12 inspektorë të ambientit gjithsej, prej të cilëve vetëm 3 janë inspektorë të ujërave.
Çmimi për gazetari të gjelbër, ku Donjeta Murselaj dhe Eriona Hoti e fituan vendin e dytë u nda të martën nga Java për Zhvillim të Qëndrueshëm në Kosovë (KSDV).
