Drejtor ekzekutiv i Forumit Ballkanik, Astrit Istrefi parashikon që Marrëveshja Bazë mes Kosovës dhe Serbisë do të zbatohet.
“Besoj që marrëveshja do të zbatohet, nëse sot jo, në një të ardhme do të zbatohet. Është marrë zotim si nga Kosova ashtu edhe Serbia. Është pjesë e obligimeve që i kanë marrë të dyja vendet. Nëse ka vështiërsi në fillimet e saj, besoj se do të zbatohet herëdokur siç ka ndodh edhe marrëveshjet e mëparshme që po riaktualizohen 10 vjet më prapa”, tha ai në emisionin “Ditari” në Tëvë1.
Istrefi thekson se duhet të ketë afate kohore për zbatimin e kësaj marrëveshjeve, derisa shton se duhet të ketë një liste me përfitime/sanksione konkrete për palët që e zbatojnë apo jo atë.
“Duhet të ketë edhe afate kohore, duhet të ketë edhe një listë nëse mund të themi për përfitimet dhe penalizimet që të dyja vendet nëse nuk arrihet progres në zbatimin e tyre. Deri sot nuk kemi një gjë të tillë, kemi hamendësime se çka mund të nënkuptojnë përfitimet për njërin apo vendin tjetër, apo cilat mund të jenë penalitetet por nuk ka ndonjë përfitim të prekshëm, të qartë, të komunikum dhe asnjë afat kohor se çfarë përfitimesh dhe kur mund të nxjerren”, tha Istrefi.
“Një përfitim kryesor është normalizimi i raporteve mes të dyja vendeve ndërsa në Kosovë kjo duhet të shihet në kuptimin e përfitimeve në planin e brendshëm më shumë se në planin e jashtëm”, deklaroi ai.
Istrefi shton se nuk ka garancione për zbatimin e kësaj marrëveshjeje, përveç nëse për ato janë të njoftuar kryeministri i Kosovës dhe presidenti serb.
“Garanci edhe siguri deri sot nuk kemi pa përveç dokumentit 11 pikësh . Nëse ka progres në zbatimin e marrëveshjeve atëherë natyrisht që do të krijonte një ambient, një rrethanë tjetër në raportet Kosovë-Serbi po ashtu edhe në raportet shqiptar-serb. Garancione nuk jemi në dijeni se mund të ketë ngase kryeministri Kurti dhe presidenti Vuçiq mund të kenë një garanci të tillë por kjo nuk është e ditur për publikun”.
“Duhet t’i kemi parasysh dy gjëra. Një është konteksti në të cilin po zhvillohet ky dialog që nuk është i favorshëm as për Kosovë dhe as për Serbi dhe e dyta, besoj që duhet të merret parasysh që nuk ka përfitime apo humbje për njërin shtet, këtu ose përfitojnë të dyja vendet e popujt, ose humbin të dyja”, ka deklaruar Istrefi në Ditari në Tëvë 1.