Përzgjedhësi i ri i Spanjës, Luis de la Fuente, e ka kthyer portierin e Chelseat, Kepa Arrizabalaga, por nuk ka ftuar 15 lojtarë që ishin në Botërorin e Katarit.
De la Fuente e publikoi listën të premten para ndeshjeve kualifikuese të Evropianit që zhvillohen këtë muaj.
Përzgjedhësi i ri, që e zëvendësoi Luis Enriquen, ka thirrur 11 futbollistë që i kishte pasur në skuadër edhe Luis Enrique në Botërorin e vitit e kaluar, kur Spanja humbi nga Maroku në 1/8 e finales.
Në listën e tij nuk janë përfshirë kuarteti i Barcelonës, Jordi Alba, Ferran Torres, Ansu Fati dhe Eric Garcia, bashkë me mesfushorët e Atletico Madridit, Koke dhe Marcos Llorente, si dhe sulmuesi i Real Madridit, Marco Asensio.
Iago Aspas i Celta Vigos që është 35-vjeçar është ftuar sërish, ndërsa ndeshjen e fundit me Spanjën e ka luajtur në vitin 2019. Mbrojtësi i Real Madridit, Nacho Fernandez 33-vjeçar, është kthyer te “Furia e Kuqe” për herë të parë që prej vitit 2018.
Kepa është në skuadër për herën e parë që prej vitit 2020. Portieri i Athletic Bilbaos, Unai Simon, që ishte titullar në Botërorin e Katarit dhe në Kampionatin Evropian, është i lënduar.
Spanja luan me Norvegjinë në Malaga më 25 mars, ndërsa kundër Skocisë do të luajë në Glasgow tre ditë më vonë.
Në Grupin A janë edhe Gjeorgjia dhe Qipro.
Në listën prej 26 lojtarëve janë edhe Dani Ceballos, mbrojtësi i Bilbaos, Inigo Martinez, dhe mesfushori i Real Sociedadit, Mikel Merino. Të gjithë këta munguan në Botëror.
Gerard Moreno i Villarrealit dhe Mikel Oyarzabal i Sociedadit u thirrën sërish pasi munguan në Katar shkaku i lëndimit.
Në vend të të pensionuarit nga përfaqësuesja Sergio Busquets, De la Fuente ka ftuar Martin Zubimendin, i cili ka vetëm një paraqitje.
Joselu Mato, sulmues i Espanyolit, mund të debutojë me Spanjën në moshën 32-vjeçare. Ai ka shënuar 12 gola në ligën spanjolle këtë sezon, dhe e njëjta vlen për qendërmbrojtësin e Osasunas, 29-vjeçarin David Garcia.
Në listë janë edhe katër tinejxherët që luajtën në Botëror, Alejandro Balde, Gavi, Pedri dhe Nico Williams.
61-vjeçari De la Fuente, ish-mbrojtësi i majtë i Sevillas dhe Athletic Bilbaos, ndihmoi Spanjën ta fitonte Kampionatin Evropian U19 në vitin 2015, e të njëjtin sukses e arriti edhe në vitin 2019 me grupmoshën U21.
Ai po ashtu udhëhoqi ekipin Olimpik të Spanjës që e fitoi medaljen e argjendtë në Lojërat Olimpike në Tokio.
Lista e Spanjës:
Portierë: Kepa Arrizabalaga (Chelsea), Robert Sánchez (Brighton) David Raya (Brentford).
Mbrojtës: José Luis Gayà (Valencia), Alejandro Balde (Barcelona), Aymeric Laporte (Manchester City), Íñigo Martínez (Athletic Bilbao), Nacho Fernández (Real Madrid), Dani Carvajal (Real Madrid), David García (Osasuna), Pedro Porro (Tottenham).
Mesfushorë: Rodri Hernández (Manchester City), Martín Zubimendi (Real Sociedad), Mikel Merino (Real Sociedad), Pedri González (Barcelona), Gavi Páez (Barcelona), Fabián Ruiz (Paris Saint-Germain), Dani Ceballos (Real Madrid).
Sulmues: Álvaro Morata (Atlético Madrid), Dani Olmo (Leipzig), Nico Williams (Athletic Bilbao), Bryan Gil (Sevilla), Mikel Oyazarbal (Real Sociedad), Iago Aspas (Celta Vigo), Joselu (Espanyol), Gerard Moreno (Villarreal).
