Kryeministri i Kosovës, Albin Kurti, priti në takim ambasadorin e ri jo rezident të Republikës Islamike të Pakistanit, Yousaf Junaid, të cilin e uroi për detyrën e re.
Në njoftimin e Zyrës së Kryeministrit thuhet se, duke e vlerësuar Pakistanin si shtet partner dhe popull mik, Kurti e falënderoi për mbështetjen ndaj Kosovës.
“U bisedua për marrëdhëniet bilaterale dhe mundësitë për zgjerimin e tyre, veçanërisht në bashkëpunim ekonomik dhe shkëmbime tregtare, si dhe në fusha të tjera të interesit të dyanshëm. Kryeministri Kurti theksoi indikatorët pozitivë ekonomikë në vendin tonë dhe potencialin për investime, duke veçuar pozitën e favorshme gjeografike dhe popullsinë e re të talentuar”, thuhet në njoftim.
Ambasadori Junaid shprehu mirënjohjen e tij për bashkëpunimin ndërmjet Pakistanit dhe Kosovës dhe shprehu gatishmërinë për intensifikim të mëtejmë.
Po ashtu, ai ka theksuar vullnetin e Pakistanit për të mbështetur zhvillimin në Republikën e Kosovës.