Manchester United është në vënë në kërkim të një sulmuesi për të ardhmen. “Djajtë e Kuq” nuk mund t’i besojnë Wout Weghorst për sezonin e ardhshëm me holandezin që ishte vetëm një zgjidhje emergjente e janarit.
Trajneri Erik ten Hag pretendon më shumë garanci nga reparti i avancuar dhe drejtuesit kanë nisur të mendojnë për alternativën më të vlefshme. I përzgjedhur është Victor Osimhen që po tregon një kualitet të jashtëzakonshëm me Napolin duke i udhëhequr të kaltrit drejt titullit kampion në Itali.
Por, për të bindur presidentin e italianëve Aurelio De Laurentis, anglezët duhet të maten mirë pasi shifrat që pretendojnë në Napoli janë stratosferike. Edhe pse duhet theksuar se dëshira për lojtarin nigerian është e madhe me mediat që bëjnë të ditur se “Djajtë e Kuq” janë të gatshëm të ofrojnë deri në 107 milionë euro.
