Rexhep Myftari, banor i Lagjes së Doktorëve, në bisedë për teve1.info, ka treguar tmerrin që po e përjetojnë pas reshjeve të fundit të borës, e që ua ka rikthyer problemin e moçëm: atë të vërshimeve nëpër shtëpia.
Mospërballimi i reshjeve të borës/shiut nga kanalizimi i lagjes, e që rrjedhimisht po shkakton vërshime tani e shumë vite – po vazhdon të mbetet një problem i madh për banorët – e aspak për institucionet lokale në Veri të Mitrovicës.
Miftari tregon se janë neglizhuar kërkesa e tyre vazhdimisht nga kryetari i komunës veriore, Goran Rakiq, teksa thotë se një gjë të tillë e kanë bërë edhe institucionet tjera lokale dhe qendrore.
Ai tregon se kanë biseduar me ish-kryetarin e Komunës së Mitrovicës së Jugut, Agim Bahtiri, në kohën sa ky i fundit ishte në pozitën e kryetarit – për të zgjidhur problemin e tyre, por thotë se nuk kanë marrë asnjë lloj ndihme.
Sipas Rexhep Myftarit, Agim Bahtiri u kishte kthyer përgjigje përmes një letre, duke iu thënë se sipas marrëveshjes së Ahtisarit, Mitrovica e Veriut është e ndarë institucionalisht nga ajo e Jugut, dhe se ai si kryetar, nuk mund të bëjë asgjë.
Myftari shton se Bahtiri kishte kërkuar nga ta që të flasin me kryetarin e Komunës së Mitrovicës së Veriut, Goran Rakiq, por që nga ky i fundit tani e shumë vite nuk kanë marrë fare përgjigje.
Përveç problemit me ujëra dhe vërshime, Myftari tregon se shqiptarët në Lagjen e Doktorëve, vazhdojnë të kenë probleme edhe me furnizim me energji elektrike.
Mirëpo, këta banorë, përveç faktit se po diskriminohen në baza etnike – duke u neglizhuar secila kërkesë e tyre si banorë shqiptarë, tek autoritetet që udhëhiqen nga serbët, një sabotim po e ndjejnë edhe nga institucionet qendrore.
Banorët e Lagjes së Doktorëve, po kërkojnë nga niveli qendror dhe lokal, që t’u bëhet zgjidhje për problemet e tyre, të vazhdueshme.
Teve1 u sjell pamje të realizuara gjatë ditës së sotme, ku shihet qartë problemi me të cilin përballen banorët shqiptarë të veriut të Mitrovicës:
