Mbrëmjen e së mërkurës, ministri i Punëve të Brendshme, Xhelal Svecala, përmes një postimi në twitter tha se Serbia e ka shkelur marrëveshjen e Brukselit.
“Serbia ka shkelur marrëveshjen e nëntorit 2022 për targat e makinave. Drejtoria Kufitare e Policisë së Kosovës së fundmi ka zbuluar raste të veturave me targa të paligjshme të rinovuara nga autoritetet serbe deri në dhjetor të vitit 2022. Si pasojë, iu është ndaluar hyrja në Kosovë”,ka shkruar Sveçla.
Me anë të një kundër reagimi, Drejtori i të ashtuquajturës, “Zyre për Kosovën”, Petar Petkoviq, ka thënë se Kosova është ajo që po e shkel marrëveshjen.
“Duket se ju @xcvecla nuk e keni lexuar marrëveshjen e fundit për targat. Ai kërkon qartë që Beogradi të ndalojë lëshimin e targave të reja KM dhe se PR do të ndërpresë çdo veprim të mëtejshëm në lidhje me procesin e ri-regjistrimit. Çdo gjë tjetër është një shkelje e drejtpërdrejtë e kësaj marrëveshjeje”,ka thënë ai.
Por, nga Bashkimi Evropian nuk po konsideron që Serbia po shkel, marrëveshjen, ndërkohë që u bën thirrje palëve për përmbajtje.
“Ne,gjithashtu, kemi marrë parasysh vendimin e Serbisë, më 6 dhjetor 2022, që letrat ngjitëse të regjistrimit për targat KM nuk do të rinovohen. Ne kuptojmë se rinovimi i sigurimit dhe kontrolli teknik ka të bëjë me automjetin e jo me tabelat e regjistrimit, dhe si i tillë nuk mund të konsiderohet rinovim i tabelave të regjistrimit”,deklaroi Stano.
Kjo paqartësi është krijuar për faktin se legjislacioni në Serbi, legalitetin e veturave ose regjistrimin e tyre nuk e ka të lidhur me targat, por vetëm me vazhdimin e kontrollimit teknik. Që i bije, që targat që lëshohen nga Serbia nuk kanë afat të skadimit.
Pavarësisht kësaj, profesori universitar Milazim Krasniqi thotë se Kosova duhet të fokusohet te marrëveshja përfundimtare.
“Të gjitha marrëveshjet kanë defekte të mëdha dhe e kanë të pamundur të realizohen, për këtë arsye edhe kjo ka qenë edhe gabim tentativa për ta zbatuar atëherë dhe ka qenë gabim edhe marrëveshja si është bërë edhe është e pamundur që kjo të kryhet. Bile unë mendoj që Qeveria nuk duhet shumë të harxhoj energji e të fokusohet në këtë çështje, por duhet të fokusohet më shumë në përpjekjet për të arritur një marrëveshje gjithëpërfshirëse”,vlerësoi Krasniqi.
Javë më parë tëvë1 pati raportuar se pavarësisht marrëveshjes, Serbia po vazhdonte të lëshonte targa “KM”. Por edhe marrëveshjet e kaluara, Beogradi nuk i ka respektuar.
E për këtë Arbesha Loxha nga Grupi për Studime Juridike dhe Politike, thotë se me këtë sjellje të Serbisë, është problematike për marrëveshjen përfundimtare.
“Kjo është bërë një gjë që Serbia po e bënë në vazhdimësi dhe konsideroj që duhet me ardh një kohë që me u ndërpre, sepse konsideroi që një qasje e tillë, ngreh shumë shqetësim realisht për gjithë procesin si tërësi, çka mundemi me prit ne në kuptim të një marrëveshje finale dhe aq më pak çfarë pritje mundemi me pas në respektim të një marrëveshje potenciale. Pra është një qasje vërtetë shqetësuese”,tha Loxha.
Brenda dhe jashtë vendit në vazhdimësi është thënë se qasja e butë e Bashkimit Evropian, i ka mundësuar Serbisë t’i shmanget zbatimit të marrëveshjeve të Brukselit.
Kronika e gazetarit Valmir Gallopeni.
