Kryetarja e Kuvendit, Albulena Haxhiu ka reaguar pas ceremonisë së betimit të 515 rekrutëve të rinj të Forcës së Sigurisë së Kosovës, e cila u mbajt në kazermën “Adem Jashari”.
Përmes një postimi, Haxhiu ka vlerësuar rëndësinë e kësaj ceremonie, duke theksuar se të rinjtë që iu bashkuan FSK-së morën përgjegjësinë për t’i shërbyer Republikës së Kosovës dhe qytetarëve të saj.
Ajo ka veçuar edhe emocionet e familjarëve, të cilët, sipas saj, sot i panë djemtë dhe vajzat e tyre të veshur me uniformën e FSK-së dhe të gatshëm për t’i shërbyer vendit.
“Shumica prej tyre janë rritur në Kosovën e lirë. Sot morën përgjegjësinë ta mbrojnë këtë liri, të fituar me luftën e Ushtrisë Çlirimtare të Kosovës dhe me sakrificën e gjithë popullit tonë”, ka shkruar Haxhiu.
Kryetarja e Kuvendit ka theksuar se FSK-ja po zhvillohet nga viti në vit dhe gëzon besimin e qytetarëve, si dhe respektin e partnerëve ndërkombëtarë.
Ajo ka siguruar se Kuvendi do të vazhdojë ta mbështesë ushtrinë përmes legjislacionit dhe buxhetit të nevojshëm, me qëllim të forcimit të mëtejmë të kapaciteteve të saj.
Në fund, Haxhiu u ka uruar rekrutëve të rinj shërbim të mbarë dhe suksese në çdo detyrë në shërbim të Republikës së Kosovës./teve1.info/
