Borrell ka deklaruar se përplasjet në rrugë nuk kontribuojnë në gjetjen e një kompromisi, raporton teve1.info
Tutje Borrell ka bërë të ditur se ministrat e jashtëm të BE-së, do të diskutojnë sot pikërisht për situatën në veri të Kosovës.
Sipas tij, sulmi i EULEX-it nga serbët është i papranueshëm, teksa tha se dy palet po përpiqen për de-përshkallëzim.
“Ne menduam se kishim arritur një marrëveshje, por serbët e Kosovës iu përgjigjën arrestimit të ish-policit serb të Kosovës me trazira në rrugë, madje ata hodhën shok-bomba ndaj policëve tanë (anëtarë të misionit të BE-së në Kosovë ). Kjo është e papranueshme, e di që të dyja palët po përpiqen për de-përshkallëzimin, por duhet të kuptoni se përplasjet në rrugë nuk çojnë në arritjen e një marrëveshje, e as nuk është rruga e duhur për normalizim të situatës”, deklaroi Borrell.
Ndryshe, kujtojmë se në veri të Kosovës zonë e banuar me shumicë serbe, disa grupe serbësh vazhdojnë bllokimin e rrugëve për të tretën ditë me radhë.
Bllokimin e rrugëve e nxiti arrestimi i një ish-zyrtari serb të Policisë së Kosovës, Dejan Pantiq të shtunën.
Pantiq u arrestua nën dyshimet për përfshirje në sulme kundër zyrtarëve të Komisionit Qendror të Zgjedhjeve në veri të Kosovës dhe atyre policorë./teve1.info
