Komandanti i divizionit të Gardës Revolucionare të Iranit, Amir Ali Hajizadeh, sugjeroi se shumë nga të vrarët ishin iranianë të zakonshëm që nuk ishin të përfshirë në protesta.
“Epo nuk i kam statistikat e reja por ndoshta deri tani kanë vdekur apo kanë rënë dëshmorë mbi 300 persona. Ata ishin ndër të rinjtë më të mirë të kësaj shoqërie -jo protestues. Pse? Sepse ne nuk arritëm të dallonim armikun nga miku”, tha ai.
Hajizadeh përsëriti pretendimin zyrtar se protestat janë nxitur nga armiqtë e Iranit, duke përfshirë vendet perëndimore dhe Arabinë Saudite, pa dhënë prova.
“Arabia Saudite, britanikët, evropianët, Amerika, Izraeli dhe PDKI (Partia Demokratike e Kurdistanit Iranian) janë të gjithë të bashkuar me protestuesit dhe po bëjnë gjithçka që munden”, tha ai.
Ky vlerësim është dukshëm më i ulët se numri i raportuar nga Aktivistët e të Drejtave të Njeriut në Iran, një grup me bazë në SHBA .
Sipas tyre, 451 protestues janë vrarë që nga fillimi i trazirave dhe më shumë se 18 mijë janë arrestuar.
Protestat u nxitën nga vdekja e 22-vjeçares Mahsa Amini, e cila u arrestua për shkelje të kodit të veshjes së Republikës Islamike.
Protestuesit thonë se janë të ngopur pas dekadash represioni social dhe politik dhe mohojnë të kenë ndonjë agjendë të huaj./Tëvë1/
