Kosova nuk ka strategji sektoriale të shëndetësisë që nga viti 2021.
Ndërkohë, gjatë këtyre dy vjetëve janë bërë ndryshime të shumë ligjeve dhe të udhëzimeve administrative.
Megjithatë, sipas Shoqatës së Pacientëve, këto ndryshime nuk po bëhet për qëllime adekuate.
Për këtë arsye, kryetari i kësaj shoqate, Besim Kodra, nuk pret përmirësim në këtë sektor.
“Ligjet dhe udhëzimet administrative janë duke u bërë në qëllime të ndryshme dhe nuk e godasin drejt qëllimin kryesor dhe me një kësi tempo të punës, me një kësi serioziteti të punës, mundemi me u përgatitë edhe për një dekadë të errët së sistemit shëndetësor. Duke mos e patur një strategji, një dokument cilësor e përmbajtjesor që e adreson drejt nevojën e qytetarit, nuk pres përmirësim të sektorit të shëndetësisë”, ka thënë Kodra.
Kodra madje kritikon Ministrinë e Shëndetësisë lidhur me të dhënat e strategjisë ekzistuese për qasjen e pacientit në sistemin shëndetësor.
“Thuhet se qasja e qytetarëve në sistemin shëndetësor është lehtë. Si mund të jetë e lehtë kur 40% janë pagesa të bëra nga xhepi? Kur 20% e qytetarëve nuk shkojnë fare tek mjeku në pamundësi me i pagu tarifat?”, thotë ai.
Se nuk ka ndryshime në shëndetësi me qeverisjen Kurti e përmend njohësja e kësaj fushe, Diellza Luzha.
“Qeveria aktuale është duke e trashëguar mospunën e qeverive të kaluara. Nuk është që ka ndonjë ndryshim tash e dy vite gjatë qeverisjes së tyre. Nuk është që ka ndonjë ndryshim në aspektin e QKUK-së ose edhe institucioneve tjera në përgjithësi në Kosovë”, vlerëson Luzha.
Në shkurt të vitit 2017, ministri i atëhershëm i Shëndetësisë, Imet Rrahmani kishte lansuar Strategjinë Sektoriale të Shëndetësisë 2017-2021, e cila u konsiderua si dokumenti kryesor që përcakton drejtimin dhe qasjen strategjike afatmesme të zhvillimit të sistemit shëndetësor në Republikën e Kosovës.
