Është kjo gjendja e krijuar në një nga shkollat në kryeqytet.
Kjo pasi punëtorët teknik, ka tre ditë që kanë hyrë në grevë.
Kësisoj, gjithë hapësira në shkollën “Ismail Qemali” në Prishtinë ka mbetur pa u pastruar.
Në shenje revolte që nuk kanë marrë pagat për mbi një muaj, këta punëtorë kanë ndërprerë punën.
“Sot jemi në ditën e 45-të që punëtorët teknik në shkolla fillore dhe të mesme nga kompanitë private, nuk kanë marrë pagat e tyre. 99% të shkollave janë në grevë, por sot në shkollën ‘Ismail Qemali’ është bërë thyerja e grevës, është bërë shkelja e Ligjit mbi grevat, Ligjit të punës dhe Ligjit sindikal, pasi që drejtoresha e kësaj shkolle në koordinim me DKA-në ka sjellë punëtorë nga jashtë, jo të kompanisë së kontraktuar por punëtorë të tjerë për të bërë pastrimin e shkollës”, tha Jusuf Azemi- Kryetar i Sindikatës së Sektorit Privat.
Tëvë1 kontaktoi edhe drejtoreshën e kësaj shkolle, por nga e njëjta nuk pati një përgjigje.
Nga drejtoria e shkollës nuk pranuan të proncohen për rastin, por siç merr vesh televizioni disa nga klasat janë pastruar nga vetë prindërit.
Këta të fundit thonë se në rast se nuk ka një reagim nga Drejtoria Komunale e Arsimit, do të bojkotojnë mësimin.
Siç njoftuan Sindikata, pagat kanë filluar të ekzekutohen gjatë ditës.
Por pa u respektuar paga minimale, Azemi paralajmëroi se do t’i vazhdojnë grevat.
“Ka një lëvizje, por që për ne nuk është pozitive. Disa shkolla sot kanë marrë pagën prej 391 euro, e që mendoj që gjatë ditës do i marrin të gjithë, por përgjigja jonë është ne nuk ka qitni, 300, 350, 50, për pa e përmbush kriterin e pagës minimale nëse ndodh edhe një muaj ditë, ne nga greva nuk dalim sepse këtë e kanë bërë për shkak të neglizhencës për mos kryerjen e çështjeve administrative. Nuk ka qare pa e bo 500 euro sepse nuk ka shërbim në këto shkolla”, theksoi Azemi.
Për gjithë këtë situatë, kritika kanë nga opozita në Prishtinë.
“Deri më tani nuk e kanë pagën minimale e cila është 500 euro, poashtu kërkojnë që të mos ketë vonesa në paga, ato t’i marrin me rregull në çdo muaj. Po deri më tani DKA nuk ka marrë asnjë hap edhe pse ata janë në grevë, e unë e kam ngrit shqetësimin e tyre në asamble, nuk ka një zgjidhje konkrete”, tha Besart Krasniqi, asamblesit i LVV-së.
Përveç shkollës “Ismail Qemali”, në kryeqytet, në grevë janë edhe punëtorët teknik të shkollës “Asim Vokshi” e “Gjergj Fishta”.
