Eksperti i sigurisë, Shkëlzen Sopjani vlerëson se në ditën e parë të situatës së krijuar në komunën e Zveçanit, KFOR-i nuk ka qenë i përgatitur të ballafaqohet me turmën e protestuesve serbë.
Sipas tij, KFOR-i nuk kanë pasur një pasqyrë të qartë se kë kanë përballë në veri.
“Nuk është që s’vepruan, u munduan me vepru. Por duhet ta kemi parasysh që KFOR-i si forcë nuk është shumë e specializume në menaxhim të turmave, marrë parasysh se nuk e kanë funksion primar sundimin e ligjit. Funksioni i tyre primar është siguria, e jo sundimi i ligjit. Aty u pa një jo përvojë e pjesëtarëve të KFOR-it për reagim në situata të tilla. Ndoshta ata është dashur me u koordinu pak ma mirë me Policinë e Republikës së Kosovës të cilët kanë përvojë të theksuar në menaxhim të turmave dhe në rend e ligj. Por prapë po e them, u pa qartë që KFOR-i nuk ka qenë i vetëdijshëm se me çfarë turme ka me pas punë, edhe pse ndoshta edhe nuk kanë prit që turma do të reagojë kundër KFOR-it”, deklaroi ai në “Ditari” në Tëvë 1.
Sopjani shtoi se largimi i Policisë së Kosovës në tri komunat veriore është paksa i rrezikshëm, pasi siç thotë ai, “kjo është një lloj dorëzimi i asaj pjese”.
Numri i pjesëtarëve të KFOR-it të lënduar të hënën gjatë protestave në Zveçan ka qenë 30.
Sipas njoftimit të tyre, 11 ushtarë nga kontingjenti italian dhe 19 nga kontingjenti hungarez kanë pësuar lëndime të shumta, duke përfshirë thyerje dhe djegie nga mjetet ndezëse shpërthyese të improvizuara. /Teve1.info/