Dyert u hapën në vitin 2017.
Por në objekt deri më tani nuk ka hyrë asnjë nxënës.
Kjo pasi shkolla e nisur gjashtë vjet më parë në qytetin e Lipjanit ende nuk ka përfunduar.
E gjithçka që ka mbetur këtu është vetëm materiali ndërtimor.
“Shkolla e re është investim i Ministrisë së Arsimit. Ka filluar të ndërtohet në vitin 2017 dhe është në vazhdim e sipër të punimeve. Presim që sa më shpejt me përfundu. Është e nevojshme për nxënësit, për shkak të numrit të madh të nxënësve në objektet tjera, kështu që sa më shpejt me përfundu është më mirë për shkollën”, Skënder Rudari, drejtor i shkollës ‘’Adem Gllavica’’
Kjo shkollë ka mbetur në këtë gjendje derisa në shkollën ‘’Vëllezërit Frashëri’’ në Lipjan frekuentojnë mësimin mbi një mijë nxënës.
Por pavarësisht kësaj, komuna e Lipjanit thotë se nuk ka lëvizje në këtë drejtim.
“Ai objekt është shumë i rëndësishëm për komunën e Lipjanit dhe për riorganizimin e shkollave në qytet për shkak të ngarkesës shumë të madhe të shkollës ‘Vëllezrit Frashëri’ në qendër të qytetit dhe ne kemi mendu me hy me një ristrukturim të shkollave në qytet. Kemi kontaktu përgjegjësit në ministri, jemi mundu me bo presion, me ua sqaru nevojën për atë shkollë por nuk ka lëvizje pozitive në atë drejtim”, shprehet Rasim Hasani, drejtor i DKA-së në Lipjan
Tëvë1 kërkoi përgjigje nga Ministria e Arsimit se kur do të fillojë funksionalizimi i shkollës në Lipjan, mirëpo nga kjo ministri nuk i janë përgjigjur interesimit të televizionit.
Objekti ndodhet në oborrin e shkollës së mesme profesionale ‘’Adem Gllavica’’ në qytetin e Lipjanit.
