Shkrimtarit me famë botërore Ismail Kadare, do t’i dorëzohet nënshtetësia e Kosovës nga presidentja Vjosa Osmani.
Ajo këtë do ta bëjë gjatë vizitës dy ditor në Shqipëri, e cila fillon të hënën.
Këtë e ka konfirmuar Presidenca, ku ka njoftuar për aktivitetet e Osmanit gjatë kësaj vizite.
“Në kuadër të kësaj vizite shtetërore, Presidentja Osmani në një ceremoni do t`ia dorëzojë dekretin e nënshtetësisë së Kosovës, shkrimtarit me famë botërore, Ismail Kadare”, thuhet nga Presidenca.
Presidentja e Kosovës, Vjosa Osmani, më 1 gusht kishte nënshkruar dekretin me të cilin shkrimtarit shqiptar me famë botërore, Ismail Kadare, i jepet nënshtetësia e Republikës së Kosovës.
Sipas Presidentes Osmani dhënia e nënshtetësisë ikonës së letërsisë shqipe, shkrimtarit Ismail Kadare është nderim për shtetin e Kosovës për krijuesin, i cili vazhdimisht është pikë e rëndësishme referimi për shqiptarët kudo në botë.
“Republika e Kosovës dhe qytetarët e saj ndihen të nderuar nga personaliteti i shquar i kombit, shkrimtari ynë i përmasave botërore, Ismail Kadare, i cili me krijimtarinë e tij ka afirmuar gjuhën, kulturën dhe traditën tonë”, ishte shprehur Osmani.
