Në një konferencë për media, Kurti u shpreh se kjo që po ndodh është shprehje e frikës “së saj se do të mbetet e vetmuar”.
“Armatosja e vazhdueshme e Serbisë nuk është e parrezikshme për rajonin dhe Kosovën, por është shprehje e frikës së saj se mund të ngelet e vetmuar atëherë kur nuk do të mund të qëndrojë në disa karrige siç është mësuar”, tha Kurti.
Ai thotë se Kosova është e brengosur dhe e vëmendshme për armatosjen e vazhdueshme të Serbisë por nuk ka frikë.
Ndryshe, reagimi i tij erdhi pasi Serbia ka marrë një sistem të sofistikuar kundërajror kinez gjatë kësaj fundjave, mes shqetësimeve perëndimore se një grumbullim i armëve në Ballkan në kohën e luftës në Ukrianës mund të kërcënojë paqen e brishtë në rajon.
Të dielën mediat dhe ekspertët ushtarakë thanë se gjashtë avionë transportues të Forcave Ajrore Kineze Y-20 u ulën në aeroportin civil të Beogradit herët të shtunën, duke raportuar se mbanin sisteme raketore HQ-22 për ushtrinë serbe./teve1.info/
