Isufi këto komente i bëri një ditë pasi kryeministri i Malit të Zi Dritan Abazoviq tha se në Mal të Zi demarkacioni është një çështje e përfunduar.
Sipas Isufit, Qeveria duhet të mendojë edhe për demarkacionin me Serbinë.
Isufi thotë se palët duhet të takohen patjetër për gjetjen e pikave në terren, pavarësisht deklaratave të Abazoviqit.
“Ata kanë një letër të nënshkruar nga ish-kryetari i shtetit dhe me siguri që kanë edhe vullnetin politik me zbatu atë nënshkrim, është vazhdimësi politike e secilit shtet. Dhe e dyta pse jo diskutimet janë deri në momentin ku vendosen piramidat, nuk munden me thanë nuk mund të diskutojmë sepse s’ka piramida në terren dhe çfarëdo shfrytëzimi i terrenit është ilegal nëse nuk vihen gurët aty ku duhen”, tha ai.
Tutje ish-anëtari i komisionit për shënjimin e kufirit thotë se për t’u shënuar saktë vija kufitare duhet të dihet saktë pse ka ndryshuar ndër vite sipërfaqja e Malit të Zi.
“Ka gjetje të cilat dëshmojnë për një shmangie të vijës kufitare sidomos të vijës së parë kufitare që ka qenë në mes të këtyre dy shteteve dhe që pala malazeze vet e ka vërtetu. Tjetër me rëndësi është sipërfaqja e Malit të Zi. Ajo sipërfaqe nuk është e njëjta e cila ka qenë e regjistruar dhe e publikuar nga qarqet e Malit të Zi dhe ish-Jugosllavisë por ka ndryshu, duhet me dit pse”.
Isufi shton se sfidë në vete do të jetë edhe përcaktimi i kufirit me Serbinë që sipas tij është i gjatë 380 kilometra. Megjithatë ai deklaron se Kosova është më e përgatitur kësaj radhe.
Pak muaj para se Abazoviqi ta merrte postin e kryeministrit të Malit të Zi, kryeministri Albin Kurti tha se po e priste Qeverinë e re në shtetin fqinj, pa elemente pro-ruse që të fliste për çështjen e demarkacionit. Megjithatë të pyetur për një qëndrim pas deklaratave të Abazoviqit, nga Qeveria nuk i kanë dhënë përgjigje televizionit gjatë së mërkurës.
Demarkacioni me Malin e Zi ishte ratifikuar në Kuvendin e Kosovës në mars të vitit 2018. Madje miratimi i saj ishte kushtëzuar me liberalizimin e vizave nga Bashkimi Evropian, mirëpo vizat ende nuk janë hequr.
Kronika e realizuar nga Gojart Jashari
