Hulumtuesi në Institutin Demokratik të Kosovës, Eugen Cakolli thotë se largimi i kryetarëve të katër komunave veriore përmes votimit nga ana e qytetarëve është i mundshëm dhe nuk varet nga vullneti i ekzekutivit.
Për Cakollin, korniza ligjore që e mundëson largimin e këtyre kryetarëve është adekuate.
“Krejt çka duhet është miratimi i dy rregullave nga ana e KQZ-së – njëra për procedurat e verifikimit të nënshkrimeve dhe përputhjes së tyre me listat e votuesve; si dhe tjetra për procedurat, afatet dhe modalitetet tjera të procesit të votimit ku qytetarët pyeten se a janë ‘për’ apo ‘kundër’ largimit të kryetarit”, ka shkruar Cakolli.
Cakolli duke komentuar deklaratat e zv/kryeministrit Bislimi se Kosova nuk duhet të shpallë zgjedhje në veri pa u hequr sanksionet nga BE-ja, ka shkruar se demokracia e drejtpërdrejtë dhe mekanizmat e pjesëmarrjes qytetare nuk mund të kufizohen apo pengohen nga qeveria.
“…Qoftë kjo si përpjekje për të blerë kohë, për t’iu shmangur obligimeve (të Bratisllavës), e aq më pak për t’a kushtëzuar heqjen e masave nga BE-ja”, ka shtuar ai, transmeton teve1.info.
