Greqia është shokuar nga aksidenti tragjik më i madh hekurudhor në historinë e saj. Pamjet e frikshme të përplasjes së një treni pasagjerësh me një tren mallrash në orën 11 e 15 minuta të mbrëmjes të së martës kanë bërë tashmë xhiron e mediave vendase e të huaja.
Bilanci tragjik përfshin 40 persona që kanë humbur jetën, asnjë shtetas shqiptarë mes tyre dhe 60 të plagosur prej të cilëve 25 në gjendje serioze dhe 6 në intubim. Disa prej shtetasve shqiptarë që janë plagosur janë mjekuar dhe kanë shkuar në shtëpitë e tyre, me përjashtim të një 18-vjeçareje e cila do të dalë nesër, bëjnë me dije organet konsullore në Selanik.
Mbi 40 autoambulanca, 150 zjarrfikës forca të policisë e ushtrisë kanë shkuar në vendgjarje për t’u ardhur në ndihmë udhëtarëve.
Kryeministri Kyriakos Mitsotakis që ka shkuar pranë vendit të aksidenti ka shpallur tri ditë zie për viktimat dhe flamujt gjysmë shtizë do të valëviten deri ditën e premte në të gjithë vendin.
Gjithashtu janë anuluar gjithë aktivitetet sportive.
“Ajo që po përjetojmë sot është shumë e vështirë. Po përjetojmë, si vend, një tragjedi të papërshkrueshëm. Mendimet tona sot janë para së gjithash me të afërmit e viktimave, prioritet është kujdesi për ata që janë plagosur dhe më pas identifikimi i trupave. Ajo që mund të them është një gjë: mund të garantoj se do të gjejmë shkakun e kësaj tragjedie dhe do të nxjerrim mësimet që të mos ndodhë më”, tha Mitsotakis.
Autoritetet vendase ende nuk japin një pamje të qartë për shkaqet e tragjedisë, ndërsa është arrestuar përgjegjësi i stacionit të Larisës dhe prokurori ka filluar një hetim të përgjithshëm për ngjarjen.
Përplasja ka ndodhur në rrethana deri tani të paqarta në një moment kur përgjegjësi i stacionit të Larisës ka urdhëruar trenin e pasagjerëve të ndërronte linjën e tij dhe të shkonte te shinat në të cilat vinte nga drejtimi i kundërt treni i mallrave.
Ajo që po hetohet është fakti se ndërsa dy trenat kanë lëvizur në drejtim përballë njëri-tjetrit për 10 minuta, ose për gati 25 km, nuk ka pasur njoftim në aparatet e monitorimit, një prej mangësive kryesore të sistemeve moderne drejtuese që thuhet se mungojnë në hekurudhën greke, përveç mangësive e dobësive të tjera të kompanisë.
Për shumë orë, po operohet poshtë vagonëve të parë poshtë llamarinave për të parë nëse ka ende pasagjerë të bllokuar.
Gjithë trupat e viktimave ndodhen në spitalin e Larisës ku të afërmit presin t’i marrin pas identifikimit të tyre nga mjekët ligjore.
Tragjedia e fundit është e tretë me numër kaq të madh viktimash në Selanik, pas atyre të vitet 1968 dhe 1972 me 34 dhe 19 të vdekur, përkatësisht dhe me disa dhjetëra të plagosur.
