Faturat e tatimit në pronë këtë vit pritet të jenë më të larta deri në 100%.
Megjithatë, fundi i muajit prill është afati i fundit për pagesën e këstit të parë.
Andaj për t’ua lehtësuar këtë detyrim qytetarëve, ekzekutivi ka miratuar Projektligjin për ndryshimin dhe plotësimin e ligjit për tatimin në pronën e paluajtshme.
I njëjti parasheh se tatimpaguesit mund të përfitojnë nga zbritja e faturave të vitit 2023 deri në shumën 100 euro.
Por ky vendim po konsiderohet se do të shkaktojë dëme në mjete financiare.
Sipas kryetarit të Asociacionit të Komunave të Kosovës, Sazan Ibrahimi, është dashur që niveli qendror të konsultohet fillimisht me nivelin lokal.
“Ministria e financave në këtë rast ka vendos që komunat të marrin vendime në kuvende komunale për faljen e 100 eurove për çdo tatimpagues. Në këtë rast, në kalkulimet të cilat I ka bërë kolegjiumi jonë profesional i financave del që nëse të gjitha komunat marrin vendime të tilla, atëherë dëmi nga kjo do të jetë rreth 40% e mjeteve financiare”, ka thënë Ibrahimi për Tëvë 1.
Tutje, Ibrahimi kërkon kompensim në rast të dëmtimit të mjeteve financiare.
“Tek çështja e faljes së 100 eurove të para për çdo tatimpagues, komunat duhet të konsultohen sepse do të preket buxheti i komunës….Nëse ndodh një veprim I tillë,atëherë ne mendojmë që niveli qëndror duhet të mendojë për kompensimin e këtyre mjeteve financiare ndaj komunave sepse po merr vendim pa konsultë me komuna dhe duhet ta jep zgjidhjen”, ka thënë ai.
E zëvedëskryetari i Komisionit për Buxhet, Mërgim Lushtaku, njëherit edhe deputet i Partisë Demokratike të Kosovës, ka kritika për projektligjin e Qeverisë.
“Ka qenë propozim vetëm sa për me e humb vëmendjen tek dështimi I tij. Aty ai propozim ka ardh aty për aty pa i analizu mirë faktorët që sot po dalin të shqetësuar shumë komuna për arsye se në bazë të ligjit sigurisht e kanë kërkuar edhe buxhetin e tyre”, ka thënë Lushtaku.
Tatimi në pronë është taksë vjetore komunale dhe përcaktohet nga shumëzimi i vlerës së pronës me normën tatimore.
Kronika e realizuar nga Valëza Sylejmani
