Këto deklarata ai i ka bërë në mbledhjen e Qeverisë, teksa tregoi për takimin që pati me Shefin për Politikë të Jashtme të BE-së, Josep Borrell, Emisarin për Dialog, Miroslav Lajçak dhe presidentin serb, Aleksandar Vuçiq.
Madje, ai tha se nuk kanë hatërmbetje e as inate me BE-në dhe se Kosova është vendi më pro-evropian.
“S’kemi as hatërmbetje e as inate. Nuk veprojmë as nuk sillemi me cinizëm, por veprojmë me të vërtetën. Kosova është vendi më pro-evropian dhe këtë nuk mund ta mohojë askush. Sa i përket sundimit të ligjit dhe demokracisë jemi para Serbisë”, ka thënë Kurti.
Tutje, kryeministri thotë se Kosova në dialog është pala konstruktive dhe se është i gatshëm për takime tjera në mënyrë që të gjindet zgjidhje për çështjen e targave.
“Në dialog jemi pala më aktive dhe konstruktive, e njëjta nuk mund të thuhet për palën tjetër. Ndaj BE-së kam qenë dhe do të jem kritik por asnjëherë të hidhëruar. E tillë ka qenë edhe deklarata ndaj përfaqësuesit Borrell. Jam i gatshëm për takime për gjetjen e një zgjidhjeje”, shtoi ai.
Ndryshe, pas takimit të së hënës nuk është arritur dakordim për zgjidhjen e çështjes së konvertimit të targave ilegale serbe në ato “RKS”.
Në një konferencë për media pas këtij takimi, Borrell u shpreh se Kurti nuk pranoi propozimin e BE-së për targa, teksa Serbia e pranoi atë.
Ndërkaq, lidhur me këtë çështje të mërkurën do të takohen kryenegociatori, Besnik Bislimi dhe atij serb, Petar Petkoviq./teve1.info/
