Lotët nuk mund t’i mbajnë edhe pas 28 vitesh.
Familjarë, bashkëluftëtarë e përfaqësues politik u mblodhën mëngjesin e së shtunës tek varrezat e dëshmorëve në Velani të Prishtinës.
Kjo për të kujtuar dy heronjtë e kombit, Ilir Konushevcin e Hazir Malën, në përvjetorin e vrasjes.
Pranë varreve të tyre u vendosën kurora lulesh në shenjë nderimi.
E në mesin e pjesëmarrësve këtu ishte, edhe shoku i fëmijërisë e bashkëluftëtari i Ilir Konushevcit, ish gjeneral, Naim Haziri.
“Kam pas fatin që të rritem bashkë me të që nga shkolla fillore e deri në ditën e rënies kemi qenë bashkë në angazhimet tona dhe është një ndjenjë shumë e veçantë për mua, sa e dhimbjes por edhe krenarisë, që e kam pas një shok, një mik e një bashkëluftëtar të tillë”, tha ish-gjenerali.
Homazhe pranë vendit ku pushojnë dy heronjtë e kombit, bëri edhe ambasadori i Shqipërisë në Kosovë, Petrit Malaj.
“Ikja e tyre ishte një e papritur dhe një dramë e madhe në atë kohë për UÇK-në, për gjithë popullin shqiptar në Kosovës dhe në Shqipëri. Ne kemi për detyrë të nderojmë dhe të respektojmë për atë se çfarë bënë këta, ata bënë gjithçka që shqiptarët e Kosovës e Shqipërisë bëjnë”, tha ambasadori Malaj.
Figura e Konushevcit e Malës u nderua edhe nga përfaqësues politik.
“Jemi duke nderuar të dy heronjtë të kombit tonë, një ditë jashtëzakonisht, e veçantë. Ajo se çfarë mund të them për Ilirin, ai ishte një ndër themeluesit të Ushtrisë Çlirimtare të Kosovës, vlerës tonë më të lartë kombëtare dhe ishte një nga personalitet që i bashkëdyzonte dy veti shumë të fuqishme atë organizative dhe strategjik”, tha anëtari i AAK-së, Besnik Tahiri.
Ilir Konushevci e mjeku Hazir Mala u vranë në mëngjesin e hershëm të datës 9 maj 1998, teksa po transportonin armë për UÇK-në.
