Një ndër vendet më të vizituara në Kosovë për ditën e Pavarësisë së Shqipërisë vazhdon të jetë Prekazi. Kjo pasi kjo datë shënon edhe datën e lindjes së Komandantit legjendar Adem Jashari. Se si u prit kjo ditë në Prekaz tregon kronika e përgatitur nga gazetarja Rinesa Osmanaj.
Si çdo 28 nëntor, destinacion e kanë Prekazin.
Vendin ku nderohet komandanti legjendar Adem Jashari dhe familjarët e tij, vendi ku flet historia.
E këtë ditë, dhimbje ka një ish-ushtar i UÇK-së, i cili ende nuk ka gjetur kufomat e prindërve të tij.
“Ato emocione te cilat i kemi dhe i kemi përjetu janë shumë të rënda. Po nisem prej familjes time, i kam tre të vrarë nga forcat serbe barbare ku babë e nënë i kam të zhdukur, ende si kam gjetur kufomat e tyre dhe çdo herë i kam në shpirt në zemër dhe s’mund t’i largoi nga truri vuajtjet e tyre”, tha Shermet Jashari, ish-ushtar i UÇK-së.
Që nga mëngjesi në Prekaz erdhën numër i madh i qytetarëve nga Kosova dhe jo vetëm.
“Së pari duhet të i përkujtojmë dëshmorët që kanë rënë për këtë liri, edhe mos t’ia humbim gjakun e tyre, të punojmë dhe të veprojmë dhe të jemi sa më të bashkuar ndërmjet vete”, tha Skender Isufi-qytetar.
“Tregojmë se jo vetëm kjo festë por kemi edhe ditëlindjen e komandantit, daljen në skenë të Ushtrisë Çlirimtare të Kosovës, do të thotë çdoherë ua kujtojmë dhe ligjërojmë”, u shpreh Ismet Mahmutaj.
Nuk munguan as fëmijët të cilët janë veshur me veshje kombëtare, e po i këndonin Shqipërisë.
