Është 9 qershori i vitit 1999.
Gjenerali i NATO-s në atë kohë, Mike Jackson doli për ta dhënë lajmin për një marrëveshje të rëndësishme me Republikën Federale të Jugosllavisë, në Kumanovë.
Kjo ujdi kishte të bënte me përfundimin e luftës në Kosovë dhe njëherësh edhe fundin e Serbisë në Kosovë.
Prapaskenat e asaj dite i ka të freskëta edhe gazetari që kishte raportuar për këtë ngjarje, Nexhat Aqifi.
“Ne kishim takim kryesisht aty ishim nën udhëheqjen e forcave franceze të NATO-s, kishim kontakt me një toger francez emrin nuk më kujtohet dhe disa orë përpara më bëri me dije se marrëveshja sot definitivisht do të nënshkruhet, ne u mobilizuam dhe me disa kolegë ua përcolla dhe ishte një moment kolegë të nderuar i papërshkruar”, ka thënë Aqifi.
Për gazetarin në pension, ky mbetet raportimi më i rëndësishëm i gjithë karrierës.
“Për 45 vite sa kam përcjellë ngjarje të rëndësishme të shumta mirëpo kjo është ajo që më ka mbetur gjithnjë në kujtesë dhe gjithnjë krenohem se isha dëshmitarë apo lajmëtar i lirisë së Kosovës në atë marrëveshje që u arritë në Kumanovë, mburrem dhe them gjithnjë kur ka nevojë të përmendet në një moment e përmendi rastin e përcjelljes së Marrëveshjes së Kumanovës”, u shpreh tutje Aqifi.
E dy ditë pas, më 11 qershor ushtarët e Ushtrisë Çlirimtare të Kosovës hynë në Prishtinë.
Një nga ta ishte Lirak Çelaj.
“U futëm në Prishtinë për çka për mu personalisht ishte një moment shumë emocional kur e kam parë tabelën e Prishtinës kam qenë në makinë me Saimir Konushevcin jemi futë nga Llukari dmth nga pjesa e Gollakut jemi futë në Prishtinë, unë jam emocionu shumë që arrita ditën që i uniformum të hyjë në Prishtinë dhe ta shohë Prishtinën përsëri dhe natyrisht shenjat ishin që Prishtina do të jetë e lirë edhe pse endek ishte forca serbe por ishte plani i zhvendosjes së tyre prej këtu” , u shpreh Çelaj
Çelaj kujton se gëzimi për lirinë shihen edhe në fytyrat e njerëzve.
“I madh e i vogël kanë vrapu na kanë përqafu, ka qenë një mikpritje shumë e mirë, atëherë kishte qenë diçka që e kanë pritë me shumë kohë edhe një prej takimeve të para me qytetarë që na ka organizu ka qenë Osman Dumoshi i ndjeri tash i cili në lagjen e vetë i kishte ftu disa banorë që kishin mbetë aty edhe jemi taku me gjithë ata dhe kanë qenë njerëz dmth një përjetim që shumë vështirë mund të përshkruhet sot”, theksoj Çelaj
Në Marrëveshjen e Kumanovës u vendos që të shpërbëhet Ushtria Çlirimtare e Kosovës, për t’u shndërruar më pas në Trupat Mbrojtëse të Kosovës.
