Më 6 shtator të vitit 1999, nisi punën si zyrtar policor.
Nga atëherë e deri më sot, Bajrush Rexhepi si kadet i gjeneratës së parë, ende vazhdon shërbimin ndaj qytetarëve.
Ai tregon se në kohën kur aplikoi për t’u bërë pjesë e këtij institucioni, motivi ishte i lartë.
Kjo për shkak se fillimisht kishte qenë pjesë e Ushtrisë Çlirimtare të Kosovës.
“Gjithçka ka qenë fillimisht e zorshme për ne për arsye se së bashku me kolegë, fillimisht filluam të mendojmë se si do dukemi, çka duhet vepruar, çka duhet bërë, si do të na pret populli kur dalim në rrugë e shumë gjëra tjera që me të vërtetë ka qenë emocionuese”, deklaroi Bajrush Rexhepi.
137-shi i Policisë thotë se ende e kujton qartazi ditën e tij të parë në uniformën policore.
“Takimi i parë me masën, popullin tonë ka qenë dicka e papërshkrueshme kur me të vërtetë ka qenë befasuese edhe për ta, për popullin kur kontakti i parë ishte: O ju Policia e Kosovës, gjithçka që një ëndërr u bë realitet… Qytetarët dëshironin të na ofroheshin afër, të na pyesnin lloj lloj pyetjesh, të bënin fotografi me neve, të bisedonin, ishte e pakapshme për ta qysh Policia arriti të flas në gjuhën e tyre”, tha Rexhepi.
Përgjatë 27 vitesh, Rexhepi pohon se u shoqëruan me sfida të mëdha, por që është krenar me progresin e arritur të Policisë në përgjithësi.
“Krenaria më e madhe në jetën time personale për mua dhe kolegët të cilët kemi startuar në gjeneratën e parë është kjo. Ne e shkruajtëm një histori, e ndërtuam një institucion, ne i besuam popullit, populli na besoi neve populli, ne arritëm një urë lidhëse ndërmjet popullit dhe Policisë që me të vërtetë ka qenë një sukses i madh, kjo është arritja më e madhe e neve si oficer të Policisë së Kosovës”, pohoi Rexhepi.
Aktualisht, ai është i angazhuar si hetues i vendit të ngjarjes në Sektorin Rajonal të Hetimeve në Ferizaj.
Polici i gjeneratës së parë u bën thirrje edhe të rinjve të mos hezitojnë dhe të bëhen pjesë e kësaj organizate sigurie.
