Gjatë takimit me Asociacionin e Komunave të Kosovës, Kurti tha se vitin që shkoi platforma E-Kosova ka arritur në 130 shërbime elektronike për qytetarët.
“Digjitalizimi i shërbimeve komunale do të ndikoj në transparencë të institucioneve. Ka edhe shumë projekte e nisma të përbashkëta, andaj bashkërisht përmes ekzekutimit të buxhetit të mirëfilltë të lehtësojmë jetën e qytetarëve. Qasja jonë është që të jemi afër qytetarëve duke qebe afër komunave e për këtë na nevojitet intensifikim i punës së komunave. Si kryeministër jam i gatshëm të jem afër jush për tu angazhuar për progresin demokratike, ekonomik e social të Republikës”, tha Kurti.
Kryeministri përmendi edhe njëherë buxhetin e vitit 2023, i cili tha se është më i larti ndonjëherë në Kosovën e pavarur.
“Për nivelin komunal ka rritje të buxhetit prej 100 milionë Euro krahasuar me vitin paraprak. Kjo duhet të reflektoj edhe në rritjen e shërbimeve komunale, i mirëqenies së qytetarëve, e zhvillimit të sportit kulturës etj. Shfrytëzimi i këtij buxheti të jetë i hapur, transparent për qytetarët”, tha Kurti.
Ai tha se me këtë buxhet janë paraparë 240 pozita të reja për inspektoratet, me qëllim që të mbrohen të drejtat e punëtorëve, të sigurohet cilësia e shërbimeve, mbrojtja e konsumatorit etj.
